حلوة حبة القارص 🍋 بحشو سهل و طريقة مبسطة 👌

اليكم طريقة تحضير حلوة حبة القارص بحشو سهل و طريقة مبسطة مقدم من أم وليد .

المقادير

العجينة: 

125 غ مارغرين طرية، 2 ملاعق كبيرة سكر رطب، 1 حبة بيض، فانليا، 2 ملاعق كبيرة زيت،1 ملعقة صغيرة خميرة كيماوية، فرينة؛

الطبقة الثانية: 

شوكولاطة بيضاء ، ملون اصفر ، جوز الهند، سوبر كرام ذوق ليمون

التزين: القوفريط مبشور، مربى المشمش؛

التزيين: 

عجينة السكر لون اخضر ، طابع شكل ورقة

طريقة التحضير

العجينة: في اناء نضع المارغرين الطرية و نضيف لها السكر الرطب، البيضة كاملة، فانليا، زيت و نخلطهم مع بعض حتى نتحصل على خليط كريمي، نضيف قليل من الفرينة ، خميرة كيماوية و نلم ؛

ثم نضيف الفرينة تدريجيا و نلمها حتى نتحصل على عجينة طرية لا تتلسق؛

نضعها فوق كيس بلاستيكي و نفتحها بالحلال سمك 5 ملم ثم نطبعها بطابع شكل حبة ليمون و نضعها في سنية بها ورق الطهي و ندخلها الى فرن مسخن من قبل على 180 درجة؛

نقطع الشوكولاطة البيضاء الى قطع و نضعها فوق حمام مائي على نار قليلة و لما تذوب نضيف لها ملون الاصفر و نخلط حتى نتحصل على لون الليمون ثم ننزعها من فوق النار؛

ناخذ فرشاة و نضع طبقة اولى من الشوكولاطة في مول السليكون و ندخله للثلاجة لمدة 5 دقائق ثم ندهنه مرة ثانية و نرجعه ايضا 5 دقائق؛

الحشو: ناخذ جوز الهند و نضيف له سوبر كرام ذوق ليمون و نخلطهم مع بعض حتى نتحصل على خليط متجانس و طري؛

نحشي به مول السليكون و نسوي له السطح ثم نرجعه للثلاجة لمدة 15 دقيقة؛

ناخذ حبة الحلوة و نضع لها قليل من الشوكولاطة ثم نلصق معها حبة الليمون بعد ما ننزعهامن مول السليكون؛

التزين: ناخذ عجينة السكر ملونة بالاخضر و نفتحها بالحلال فوق كيس بلاستيكي ثم نطبعها بطابع شكل ورقة؛

نضع قليل من الشوكولاطة فوق حلوة و نلصق بها الورقة؛

نضعها على جنب حتى تجف ثم نضعها في حاويات التقديم؛

بالصحة  و الهنا